هانا: ناوەندی ئاماری رێکخراوی مافی مرۆڤی هانا مانگانە ئاماری پێشێلکارییەکانی ماڤی مرۆڤ لە کوردستان کۆدەکاتەوە و ڕایدەگەێنێ. بە هۆی نەبوونی ئازادیی ڕاگەیاندن و دەستڕانەگەیشتنی ئازاد بە ناوخۆی کوردستان، هەموو پێشێلکارییەکانی مافی مرۆڤ لەوانەیە لەم راپۆرتەدا ڕەنگ نەداتەوە، بەڵام هاوکارانی رێکخراوی مافی مرۆڤی هانا لە ناوخۆی کوردستان، ئەوپەڕی هەوڵ و کۆششی خۆیان داوە تا بتوانن پێشێلکارییەکانی مافی مرۆڤ لەلایەن حکومەتی ئیسلامی ئێرانەوە لە پارێزگاکانی کوردستان بگوازنەوە تا لە هانا تۆمار و بڵاوبکرێتەوە. 
لەم بەشەدا ئاماری دەستبەسەرکراوان، سێدارە، کوژران و برینداربوونی کۆڵبەران، رووداوەکانی شوێنی کار و گیانلەدەستدان یا بریندار بوونی کرێکاران و هەرەوەها خۆکوژییەکان لە پارێزگاکانی کوردستانی ئێران پێشکەش دەکرێ. 

مانگی سپتەمبری ٢٠٢١ 

گرتن و دەستبەسەرکران: 
لە ماوەی مانگی سپتەمبردا ٢٦ شارۆمەندی کورد دەستبەسەر کراون. دابەشکردنی ئەو شارۆمەندە دەستبەسەرکراونە لە سەر ئاستی پارێزگان بەم جۆرەی خوارەوەیە: 

پارێزگای ورمێ ١٦ کەس 
پارێزگای سنە ١٠ کەس 

لە کۆی ئەم ژمارەیە ٣ کەسیان بە تۆمەتی چالاکی ژینگە پارێزی، ٣ کەس بە تۆمەتی چالاکی مەدەنی و ٢٠ کەسیش بە تۆمەتی چالاکی سیاسی دەسبەسەر کراون. شایانی باسە هەموو ئەم شارۆمەندانە بە بێ هیچ جۆرە بەڵگەیەکی یاسایی و لەلایەن هێزەکانی سەر بە ئیتلاعاتی سپای پاسدارانەوە گیراون و دەسبەسەر کراون. 

سێدارە: 
لە مانگی سپتەمبردا ٢ کەس لە کرماشان لە سێدارە دراون، یەکیان بە تۆمەتی کوشتنی بە ئەنقەست و ئەوی دیکەش بە تۆمەتی فرۆشتنی مادە سڕکەرەکان. 
هەروەها ٣ کەس بە تۆمەتی چالاکی سیاسی و ئەندامەتی لە حزبەکانی کوردستانی ئێران سزای سێدارەیان بە سەردا سەپاوە یا دادگای پێداچوونەوە پەسندی کردووە. ئەو شارۆمەندانە خەڵکی ئەم شارانەی خوارەوەی کوردستانن: 

ورمێ ١ کەس
کامێران ١ کەس
بۆکان ١ کەس

کۆڵبەر: 
لە مانگی سپتەمبری ٢٠٢١دا ژمارەی ئەو کۆڵبەرانەی کوژراو و بریندار بوون ٢٢ کەسە. 
لە کۆی ئەم ژمارەیە ٨ کۆڵبەر کوژراون و گیانیان لەدەستداوە. 
هەروەها ١٤ کۆڵبەریش بریندار بوون. 

لە کۆی ئەم ٢٢ کۆڵبەرە ١٨ حاڵەتیان بە تەقەی راستەوخۆی هێزە چەکدارەکانی حکومەتی ئیسلامی ئێران کوژرا و بریندار بوون و ٤ کەسیش بە رووداوی سرووشتی و رووداوی رێگاوبان بریندار بوون. 

کرێکار: 
لە مانگی سپتەمبردا ١٦ کرێکار بە هۆی نەبوونی ئەمنییەت و ستانداردی شوێنێ کار لە کاتی کار کردندا گیانیان لەدستداوە. 

خۆکۆژی: 
لە مانگی سپتەمبردا ١٣ کەس کۆتاییان بە ژیانی خۆیان هێناوە. 
بەرزترین ئاستی خۆکوژییەکان لە مانگی سپتەمبردا لە پارێزگای کرماشان روویداوە. حاڵەتەکانی خۆکوژی لە سەر ئاستی پارێزگاکان بەم جۆرەی خوارەوەیە: 

پارێزگای کرماشان ٨ کەس 
پارێزگای سنە ٣ کەس 
پارێزگای ورمێ ٢ کەس 

هەروەها جێگای سەرنجە لە کۆی گشتی ئەو ١٣ شارۆمەندەی کۆتاییان بە ژیانی خۆیان هێناوە، ٣ کەسیان تەمەنیان لە ژێرەوەی ١٨ ساڵ بووە. 

رێکخراوی مافی مرۆڤی هانا 
١ی ئۆکتۆبری ٢٠٢١