بەپێی ئەم راپۆرتە پێش نیوەڕۆی رۆژی یەکشەممە ١٨ی رەزبەری ١٤٠٠ – (١٠ی ئۆکتۆبری ٢٠٢١)، دڕۆنەکانی حکومەتی ئیسلامی ئێران کاتژمێر ١٠ و بیستوشەش خولەک، بە سەر ئاسمانی بارەگاکانی کۆمەڵە و حزبی کۆمۆنیستی ئێراندا سووڕاونەوە. 

پێشتریش فڕۆکەی بێ فڕۆکەوانی ئێران بە سەر ئاسمانی بنکە و بارەگای حزبەکانی کوردستاندا خولاونەوە بەرپرسانی حکومەتی ئیسلامی ئێران لە ماوەی دوو مانگی رابردوودا گەلێک جار هەڕەشەی هێرشی سەربازییان بۆ سەر بنکە و ئوردوگای حزبەکانی کوردستانی ئێران کردووە. 

جێگای ئاماژەیە لە دەوروبەر و لە ناو ئەم بارەگا و بنکانەی حزبەکانی کوردستان، خەڵکی مەدەنی و بنەماڵەی تێدا دەژی و داوامان لە حزبەکانی کوردستانە بە وریای زیاترەوە بەڕەوڕووی ئەم جموجۆڵ و هەڕەشانەی بەرپرسانی حکومەتی ئیسلامی ببنەوە. 

لەلایەکی دیکەوە هەواڵنێری فارس سەر بە حکومەتی ئیسلامی ئێران، هێرشی کردۆتە سەر بەرپرسانی هەرێمی کوردستان و بە هۆکاری نائەمنی کردنی ناوچەکەیان دادەنێ و تۆمەتبار دەکا. 
هەڕەشە و تاوانبار کردنی بەرپرسانی هەرێم بە نائەمن کردنی ناوچەکە لە حاڵێکدایە کە حکومەتی ئیسلامی ئێران لە شار و شەقامەکان، دەریا و زەوی و بیابانەکانی رۆژهەڵاتی ناوەڕاست بە بەرچاوی دنیاوە هۆکاری سەرەکی نائەمنی، ئاژاوەناەوە، هەڵگیرسانی شەڕ و ترۆری چالاکانی سیاسی لە ناوچەکدایە و پشتیوان و ماکەی ترۆریزم و گوروپە ترۆریستەکانە و سپای پاسداران وەک هێزی سەرەکی پارێزەری ئەم حکومەتە لە لیستی گوروپە ترۆریستەکانی وڵاتانی رۆژئاوادایە. لە راستیدا ئەوە حکومەتی ئێرانە کە ئەمنییەتی لە خەڵکی ئێران و ناوچەکە ئەستاندووە و تەینا لە ٣ رۆژدا لە شەقامی شارە گەورەکانی ئێران زیاتر لە ٢٠٠٠ کەس لە خەڵکی مەدەنی ناڕازی بە گرانی بێنزین کردە قوربانی و کوشت. ئەم سیاسەتەی حکومەتی ئیسلامی خەڵکی ئێرانی رووتاندۆتەوە و هەرچی داهاتی ئێرانە و خەڵکەکەیەتی دەیدا بە گوروپە ترۆریستەکان و زیاتر لە نیوەی خەڵکی ئێران لە ژێر هێڵی هەژاریدان و تەنانەت کەم نین ئەوانەی لە برسان زبڵی زبڵدانەکان بۆ خواردن دەپشکنن. 
بە ڕەچاوکردنی ئەم سیاسەتەی حکومەتی ئیسلامی ئێران، بەداخەوە هەر خەڵکی ئێرانن کە تێیدا زەرەمەندی سەرەکین و ئەم سیاسەتە ئابووری ئێرانی داڕماندووە، و سیستەمی بێهداشتی وێران کردووە و فەرهەنگی کۆمەڵایەتی کۆمەڵگاکەی ناتەندروست کردووە بە جۆرێک کە خەڵکی ئێران بە ئاشکرا هاواریانە و لەم سیاسەتەی سەرانی حکومەت وەزاڵە هاتوون. 

سەبارەت بە کوردستانیش، حزبەکانی کوردستان هەمیشە لایەنگری ئەوەن کە کێشەی گەلی کورد لە رێگای وتووێژ و بە شێوەی ئاشتییانە چارەسەر بکرێ بەڵام ئەوە حکومەتی ئیسلامی ئێرانە کە هیچکات رێزی لە مافە نەتەوەییەکانی میللەتی کورد نەگرتووە و حازر نەبووە و نییە دانی پێدابنێ و تەنیا لە لوولەی چەکەوە یا بە زمانی ترۆر جوابی داواکارییەکانی گەلی کوردی داوەتەوە. 

شایانی باسە ئەم جموجۆڵانەی حکومەتی ئیسلامی لە کاتێکدا بەڕێوەدەچن کە وڵاتی عێڕاق سەرقاڵی هەڵبژاردنێکی ئازاد بوون و شیمانەی ئەوە دەکرێ ئەم جموجۆڵانەی حکومەتی ئێران بۆ پێکهێنانی دووبەرەکی و ئاژاوە و نائەمن کردنی کوردستانی عێڕاق بێت.