بەپێی ئەم راپۆرتە، ئەیوب ئەسەدی چوارشەممە رێکەوتی ٢٥ی جۆزەردانی ١٣٩٠ - (١٥ی ژوئەنی ٢٠١١) لەلایەن هێزەکانی سپای پاسداران لە ئاوایی "بۆریەر" دەستبەسەر کراوە و دواتر لە لایەن دادگای شۆڕشی سنەوە بە سەرپەرستی قازی بابایی، بە تۆمەتی "ئەندامەتی لە کۆمەڵەی شۆڕشگێڕی زەحمەتکێشانی کوردستانی ئێران" ٢٠ ساڵ بەندکران و دوورخستنەوەی بۆ بەندیخانەی کاشمەر بە سەردا سەپابوو. ئەم سزایە لە رێکەوتی ١٧ی سپتەمبری ٢٠١٢ بە شێوەی فەرمی بە ئەیوب ئەسەدی راگەیەندراوە. 
ئەیوب ئەسەدی رۆژی سێشەممە ٢٨ی خاکەلێوەی ١٣٩١ - (١٧ی ئاپریلی ٢٠١٢) دوای ئەوەی بە مەبەستی بەڕێوەچوونی سزاکەی بانگیان کردووە، رەوانەی بەندیخانەی کاشمەر کراوە و لەوکاتەوە تا ئێستا لەوێ بەندکراوە. 

چەند بەندی جاڕنامەی جیهانی مافەکانی مرۆڤ سەبارەت بە ماف و ئازادییە دێموکراتیکەکانی تاک لە کۆمەڵدا بەم جۆرەی خوارەوەیە: 

بەندی ٣- هەر مرۆڤێک مافی ژیان و ئازادی و ئەمنییەتی تایبەت بە خۆی هەیە. 
بەندی ٥- هیچ کەس نابێ ئەشکەنجە بدرێ یان بکەوێتە بەر کردەوە و رەفتار و سزای زۆردارانە و دژی ئینسانی و سووکایەتی پێ بکرێ. 
بەندی ٩- هیچ کەس نابێ سەرەڕۆیانە دەستبەسەر، زیندانی یا شاربەدەر بکرێ. 
بەندی ١٠ هەر کەسێک مافی ئەوەی هەیە لەوپەڕی بەرابەریدا لەگەڵ کەسانی دیکەدا لە دادگایەکی سەربەخۆ، بێ لایەن، دادپەروەر و ئاشکرادا بە کیشە و سکاڵاکەی رابگەن و دەبێ دادگایەکی لەم جۆرە لە بارەی ماف و پێویستییەکانی ئەو یا هەر تاوانێک کە دراوەتە پاڵی یان پێی تاوانبارە، بڕیار بدا. 
بەندی ١٩- هەر تاکێکی کۆمەڵگا مافی ئازادی بیروڕا و دەربڕینی ئازادانەی بیروڕای خۆی هەیە و ئەم مافەش پێویستی بەمەیە هیچ کەس لەبەر ئەوەی بیروبۆچوونێکی هەیە نەترسێ و لە وەدیهێنان و وەرگرتن و بڵاوکردنەوەی زانیاری و بیروبۆچووندا نیگەران نەبێ و ئازادانە و بێ ترس و بێ لەبەرچاوگرتنی تێبینییە سنووردارەکان دەستی بە هەموو ئامرازێکی گونجاو بۆ دەربڕینی بیروڕای خۆی و بڵاوکردنەوەی رابگا.