هەواڵ

لە ساڵی رابردوودا ٢٩ ژن بوونە قوربانی توندوتیژی  

11:28 - 25/11/2021

لە ساڵی رابردوودا ٢٩ ژن بوونە قوربانی توندوتیژی  

ناوەندی ئاماری رێکخراوی مافی مرۆڤی هانا، بە بۆنەی ٢٥ی نوامبر "رۆژی جیهانیی بەرەنگاربوونەوەی توندوتیژی بەرامبەر ژنان" راپۆرتێکی سەبارەت بە توندوتیژی بەرامبەر ژنان لە کوردستانی ئێران ئامادە کردووە. ئەم راپۆرتە رووداوەکانی ساڵی رابردوو واتە لە ٢٥ی نوامبری ٢٠٢٠وە تا ٢٥ی نوامبری ٢٠٢١ لە خۆ دەگرێ کە قوربانی لێ کەوتووەتەوە. 


لەم ئامارەدا کە رێکخراوی مافی مرۆڤی هانا تۆماری کردووە تەنیا ئەو رووداوانە لە خۆ دەگرێ کە بووەنە هۆکاری کوشتنی ژنان و باقی شێوەگەلی تری توندوتیژی وەک توندوتیژی خێزان، لێدان، ئازار و ئەشکەنجە لەلایەن ئەندامانی بنەماڵە یا هاوسەرەوە، توندوتیژی دەروونی و هەروەها توندوتیژی لە شێوەی دەربڕین و ئاخاڤتندا و سووکایەتی بە ژنان لە خۆ ناگرێ. ئەگەرچی ئەم جۆرە توندوتیژییانە لە ئاستێکی بەریندا لە دژی ژنان لە کۆمەڵدا بەڕێوەدەچن و ناڕەوایە، بەڵام بەداخەوە لە هیچ جێگایەک تۆمار ناکرێن و میدیایی ناکرێنەوە. 

بەپێی ئاماری رێکخراوی مافی مرۆڤی هانا لە ساڵی رابردوودا لە چوار پارێزگای کوردستان لە سەر یەک ٢٩ رووداوی توندوتیژی دژی ژنان تۆمار کراوە کە بووەنە هۆی کوشتنی ژنان لەلایەن یەکێک لە ئەندامانی بنەماڵەوە. زۆربەی ئەو قەتڵانەی تۆمار کراون بە هۆی کێشەو بە ناو "نامووس"ـەوە بووە. 

کۆی گشتی ئەم ٢٩ رووداوە لە سەر ئاستی پارێزگاکانی کوردستان بەمجۆرەیە: 

پارێزگای سنە ٩ کەس واتە ٣١٪ی کۆی گشتی ئامارەکە. 
پارێزگای ورمێ ٩ کەس واتە ٣١٪ی کۆی گشتی ئامارەکە. 
پارێزگای کرماشان ٧ کەس واتە ٢٤،١ی کۆی گشتی ئامارەکە. 
پارێزگای ئیلام ٤ کەس واتە ١٣،٨٪ی کۆی گشتی ئامارەکە. 

هەروەها ناوەندی ئاماری مافی مرۆڤی هانا لە خشتەیەکدا ئاستی توندوتیژی لە شارەکانی هەر چوار پارێزگای کوردستانی لێک جیا کردووەتەوە. هەڵبەت جێگای خۆیەتی ئاماژە بەمە بکەین ئەم ئامارەی پێوەندیدارە بە شارەکان رێک بەو مانایە نییە کە رووداوەکە لەو شارە دیاریکراوە هاتووەتە ئاراوە، بەڵکوو بە مانای ئەو شارە و ناوچە و ئاواییەکانی دەوربەرییەتی. 

رێکخراوی مافی مرۆڤی هانا خوازیاری کۆتایی هاتنی هەر جۆرە توندوتیژییەکە بەرامبەر ژنان و حکومەتی ئیسلامی ئێران بە بەرپرسی پێشێل کردنی مافەکانی ژنان و درێژەی ئەم توندوتیژییانە لە دژی ژنان دەزانێ. بردنەسەری ئاستی وشیاری شارۆمەندان لە رێگای پەروەردە و فێرکردنەوە و پڕۆژەگەلی خزمەتگوزاری کۆمەڵایەتی، پێکهێنانی رێکخراو و ناوەندەکانی پشتگیری ژنان، دیاری کردنی ماڵ و شوێنی ئەمن بۆ ئەو ژنانەی دەکەونە بەر هەڕەشە و توندوتیژی، بەشێکن لە سەرەتاییترین مافە رەوا و ئینسانییەکانی ژنان و هەموو شارۆمەندان.  

رێکخراوی مافی مرۆڤی هانا 
٢٥ی نوامبری ٢٠٢١ 

 
 

بۆ بینینی ئامار لە پەڕەیەکی نوێ، کلیک بکە.

11:35 - 25/11/2021 نوێ کراوەتەوە.