ناوبراو بە تۆهمەتی "چالاکی پڕۆپاگەندە دژی نیزامی کۆماری ئیسلامی" ٨ مانگ بەندکرانی بەسەردا سەپا و بە تاوانی "بێ ڕێزی کردن بە دامەزرێنەر و سەرۆک کۆماری ئیسلامی ئێران" ١ساڵ زیندانی بە سەردا سەپا. 
هاوکات لەگەڵ ئەمە ٢چالاکی تری بواری ڕاگەیاندن بە ناوەکانی "کەیوان ڕەحیم زادە" و "خالید نارین" کە هاوکاری "مستەفا حەمدی" بوون لە لایەن هێزە ئەمنییەکانەوە بانگهێشت کراون و لێپرسینەوەیان لێ کراوە.

مستەفا حەمدی بەڕێوبەری گروپی (پرسیاری سەقز) لە مانگی خەرمانانی ساڵی ڕابردوو لەگەڵ "فەردین مستەفایی" بەڕێوبەری کاناڵی "سەقز ڕووداو" و ئەندامی فیدراسیۆنی نێودەوڵەتی هەواڵنێران، "کەیوان جەلالی" بەڕێوبەر و "زاهێد شەریف پوور" سەرنووسەری کاناڵی "واکاوی" و "هیوا مەجیدی" بەڕێوبەری کاناڵی "ساکاپرێس" بە بۆنەی سکاڵای شارەداری دەرکراوی سەقز "چیا ساڵحی بابامیری" بە تۆهمەتی بڵاوکردنەوەی قسەی درۆ، بۆ ئاگادار کردنەوە لە حوکمەکەیان بۆ دادگا بانگهێشت کرابوون.
لەولاشەوە راگەیاندنکار و هەواڵنێران ئەم تۆهمەتانەیان ڕەتکردۆتەوە و لە وەڵامدا گوتوویانە ئەوەی ئەوان باسیان کردووە هەمووی راستییە و قسەیان بۆ کەس هەڵنەبەستووە.
شایانی باسە گوشاری حکوومەت بۆ سەر ڕاگەیاندنەکانی سەربەخۆی کوردستان دیسان زۆر بووەتەوە.