بەپێی ئەم راپۆرتە ناوەندە ئەمنییەکانی حکومەتی ئیسلامی بەشێکی بەرچاو لە بنەماڵەی پێشمەرگەی حزبەکانیان لە شار و ناوچە جۆراوجۆرەکانی کوردستان بانگ کردووە و وێڕای هەڕەشە، گوشاریان بۆ هێناون تا زەخت و زۆر بخەنە سەر کوڕ و کچە پێشمەرگەکانیان بۆ ئەوەی لە ریزی پێشمەرگەی حزبەکان بچنەدەر و دەست لە خەبات و چالاکی سیاسی لە دژی ئەو حکومەتە  هەڵگرن. 

شایانی باسە حکومەتی ئیسلامی ئێران لە ساڵانی رابردووشدا بۆ بە چۆکداهێنانی خەڵکی کوردستان لەم جۆرە گوشار و زەخت و زۆرانەی خستووەتە سەر بنەماڵە پێشمەرگەی حزبەکانی کوردستان و بە تایبەت لە دەیەی یەکەمی دەسەڵاتی خۆیدا بنەماڵەی پێشمەرگەکان و چالاکانی سیاسی جگە لە زیندان و ئەشکەنجە، بۆ شارەکانی دەرەوەی کوردستان دوور دەخستەوە و تەنانەت دەستی بە سەر ماڵ و دارایی گەلێک لەو بنەماڵانەدا گرت. 

بەلەبەرچاوگرتنی بەندەکانی ٣، ٥، ٩ و ١٩ی جاڕنامەی جیهانی مافەکانی مرۆڤ، ئەم کردەوانەی ناوەندە ئەمنییەکانی حکومەت پێشێل کردنی ئاشکرای مافەکانی مرۆڤ و مافی شارۆمەندییە. 

بەندی ٣- هەر مرۆڤێک مافی ژیان و ئازادی و ئەمنییەتی تایبەت بە خۆی هەیە. 
بەندی ٥- هیچ کەس نابێ ئەشکەنجە بدرێ یان بکەوێتە بەر کردەوە و رەفتار و سزای زۆردارانە و دژی ئینسانی و سووکایەتی پێ بکرێ. 
بەندی ٩- هیچ کەس نابێ سەرەڕۆیانە دەستبەسەر، زیندانی یا شاربەدەر و بە زۆرملی لە شوێنی ژیانی دوور بخرێتەوە. 
بەندی ١٩- هەر تاکێکی کۆمەڵگا مافی ئازادی بیروڕا و دەربڕینی ئازادانەی بیروڕای خۆی هەیە و ئەم مافەش پێویستی بەمەیە هیچ کەس لەبەر ئەوەی بیروبۆچوونێکی هەیە نەترسێ و لە وەدیهێنان و وەرگرتن و بڵاوکردنەوەی زانیاری لە سەر بیروبۆچوونەکەی نیگەران نەبێ و ئازادانە و بێ ترس و بێ لەبەرچاوگرتنی تێبینییە سنووردارەکان دەستی بە هەموو ئامرازێکی گونجاو بۆ دەربڕینی بیروڕای خۆی و بڵاوکردنەوەی رابگا.