بەپێی ئەم راپۆرتە، بەرەبەیانی ئەمڕۆ هەینی ٢٥ی خرمانان هێزەکانی حکومەتی ئیسلامی لە سەر سنووری نەوسوود دەستڕێژیان لە ژمارەیەک کۆڵبەر کردووە و لە ئاکامدا ئیسماعیل عەبدی تەمەن ٣٢ ساڵ و کوڕی رەشید و خەڵکی ئاوایی "بازان" لە ناوچەی جوانڕۆ گیانی لەدەستداوە.

هەروەها دوو کۆڵبەری دیکەش بە ناوەکانی حەمید ئەحمەدی کوڕی حەیدەر و خەڵکی ئاوایی "چوکڵاوا"ی ناوچەی جوانڕۆ و بەختیار فەتاحی تەمەن ٣٦ ساڵ کوڕی محەممەد رەشید و خەڵکی ئاوایی "دوێتوێ" لە ناوچەی جوانڕۆ بە خەستی بریندار بوون. 

لە درێژەی راپۆرتەکەدا هاتووە دۆخی تەندروستی بریندارەکانی ناجێگیرە. 
شایانی باسە تەرمی ئیسماعیل عەبدی لە پزیشکی دادی پاوەیە.  

بە پشتبەستن بە ناوەنی ئاماری رێکخراوی مافی مرۆڤی هانا لە لە ١٦ رۆژی سەرەتای مانگی سیپتەمبری ٢٠٢٢دا بەم کۆڵبەرانەی ئەمڕۆوە لانیکەم ٢٦ کۆڵبەر لە سنوورەکانی کوردستان کوژراون و بریندار بوون. ژمارەی ئەو کۆڵبەرانەی بە تەقەی هێزە چەکدارەکانی حکومەتی ئێران لە سەر سنوورەکان بریندار بوون لەگەڵ ئەوانەی ئەمڕۆ دەبێتە ٢٣ کەس. هەروەها لەم ١٦ رۆژەی سەرەتای مانگی سیپتەمبردا ئەمە دەبێتە دوو کۆڵبەر بە تەقەی راستەوخۆی هێزە چەکدارەکانی حکومەتی ئیسلامی ئیران و کۆڵبەرێکیش بە تەقەی چەکدارەکانی حکومەتی تورکیە گیانیان لەدەستداوە.