لێرەدا ئاماری گیانلەدەستدان و بریندار بوونی کۆڵبەران و کاسبکاران لە مانگی ئاگۆستی ٢٠٢٢ دەخەینە بەر دیدەی خوێنەران. 
لە مانگی ئاگۆستدا لانیکە ٣٤ کۆڵبەر و کاسبکار لە کاتی کۆڵبەریدا کوژراون و بریندار بوون. 
بەپێی ئەم ئامارە هەموو ئەو کەسانە لە رەگەزی نێرینە بوون. 
لە کۆی ئەم ٣٤ کەسە، ٧ کەسیان کوژراون کە هەموویان بە تەقەی راستەوخۆی هێزە چەکدارەکانی حکومەتی ئیسلامی ئیران گیانیان لەدەستداوە. 
لە مانگی ئاگۆستدا ٢٢ کۆڵبەر و کاسبکار بریندار بوون کە ١٩ کەسیان بە تەقەی راستەوخۆی هێزە چەکدارەکانی حکومەت لە سەر سنوورەکانی کوردستان بریندار کراون و ٣ کەسیش بە هۆی تەقینەوەی مین بریندار بوون. 
هەروەها لە مانگی ئاگۆستدا پێنج کەس لە کۆڵبەران و کاسبکاران لەلایەن هێزە ئەمنی و چەکدارەکانی حکومەتەوە دەستبەسەر کراون. 
بەپێی راپۆرتی ناوەندی ئاماری رێکخراوی مافی مرۆڤی هانا، لە کۆی گشتی ئەم ئامارە ٦٠ لە سەدی ئەو کۆڵبەرانە لە سەر سنوورەکانی بانە کوژراون و بریندار بوون. 

کۆڵبەری دیاردەیەکی مەترسیدارە و لە راستیدا کار نییە بەڵام خەڵکی کوردستان و بەتایبەت شار و ناوچەکانی سەرسنوور لەبەر نەبوونی کار بە مەبەستی پەیدا کردنی بژیوی بنەماڵەکەیان بە ناچار روویان کردووەتە کۆڵبەری. نەڕەخساندنی هەلی کار لەلایەن حکومەتەوە دەبێتە هۆی بێکاری و هەژاری لە کۆمەڵگادا و لەولاشەوە تەقەی راستەوخۆ لەلایەن بەڕێوەبەرانی یاساوە لە شارۆمەندانی بێکار و هەژار کە بەدوای بژیوی ژیانەوەن، بە پێی جاڕنامەی جیهانی مافەکانی مرۆڤ (کە وڵاتی ئێرانیش واژۆی کردووە و حکومەت بەرپرسە بۆ رەچاوکردن و بەڕێوەبردنی)، پێشێل کردنی ئاشکرای مافەکانی مرۆڤە لەلایەن حکومەتەوە. 

رێکخراوی مافی مرۆڤی هانا 
 ١ی سیپتەمبری ٢٠٢٢