جێگای وەبیرهێنانەوەیە رۆژی سێشەممە ٢٢ی خرمانانی ١٤٠١، ژینا ئەمینی (مەهسا) لە تاران لەلایەن هێزەکانی "گەشتی ئیڕشاد" لە شاڕێی حەقانی دەستبەسەر کرابوو و لە یەکێک لە گرتووخانەکانی "پۆلیسی ئەمنییەت ئەخلاقی" لە شەقامی "وزەرا"ی تاران بە هۆی ئەشکەنجە و ئازاری زۆرەوە وشیاری خۆی لەدەستدابوو. 

شایانی باسە تەنیا دوو کاتژمێر دوای گرتنی ژینا ئەمینی، پزیشکانی نەخۆشخانەی کەسرا رایانگەیاندبوو هاوکات سەکتەی مێشک و دڵی گرتووە و گوتبوویان ئەمە بووەتە هۆی لەکارکەوتنی مێشکی و وشیاری خۆی لەدەستداوە. 

لەولاشەوە موژگان ئیفتخاری دایکی ژینا رایگەیاندووە، کچەکەی من پێشینەی هیچ جۆرە نەخۆشینێکی نەبووە و تا ئەوە کاتەی گرتوویانە هێچ کێشەیەکی تەندروستی نەبووە. 

جێگای ئاماژەیە مەهسا ئەمینی لەگەڵ بنەماڵەکەی بۆ گەشت و گەڕان سەردانی تارانیان کردبوو.  
بەپێی بەندەکانی ٣، ٥ و ٩ی جاڕنامەی جیهانی مافەکانی مرۆڤ، دەستبەسەر کردنی سەرەڕۆیانەی مەهسا ئەمینی پێشێل کردنی ئاشکرای مافەکانی مرۆڤە و بەرپرسایەتی گیان و ژیانی دەکەوێتە ئەستۆی بەپرسانی حکومەت. 

بەندی ٣- هەر مرۆڤێک مافی ژیان و ئازادی و ئەمنییەتی تایبەت بە خۆی هەیە. 
بەندی ٥- هیچ کەس نابێ ئەشکەنجە بدرێ یان بکەوێتە بەر کردەوە و رەفتار و سزای زۆردارانە و دژی ئینسانی و سووکایەتی پێ بکرێ. 
بەندی ٩- هیچ کەس نابێ سەرەڕۆیانە دەستبەسەر، زیندانی یا شاربەدەر بکرێ.