لە ساڵی ڕابردوودا و بە تایبەت لە شەش مانگی دووهەمدا و لەگەڵ دەسپێکی شۆڕشی ژن، ژیان، ئازادی، لە ئێران و سەرکردایەتی ژنان لەم شۆڕشەدا، ژنانی زیاتر گیراون و زیندانی کراون.
لە ماوەی یەک ساڵی ڕابردوودا لانیکەم ٢٨٢ ژن بە تاوانی چالاکی سیاسی، مەدەنی، سەندیکا، ئایینی و میدیایی دەستبەسەر کراون.
لە ساڵی ڕابردوودا ٣٩ ژن خۆیان کوشتووە و ١٦ ژنیش کوژراون.
هەروەها ٢ ژن لە سێدارە دراون. لەو ماوەیەدا ۴ ژنیش بەهۆی تەقینەوەی مین بریندار بوون.
دەستگیرکردنەکان:
دابەشبوونی دەستگیرکردنەکان بەم شێوەیەی خوارەوەیە:
۲۴۷ کەس لە پێوەندی لەگەڵ شۆڕشی ژینا
۱۸ کەس لەسەر تاوانی چالاکی سیاسی
٧ کەس لەسەر تاوانی چالاکی مەدەنی
٦ کەس بە تاوانی چالاکی میدیایی
٣ کەس بە تاوانی چالاکیی سەندیکاکان
۱ کەس بە تاوانی چالاکی ئایینی
خۆکوشتن:
بەگشتی ٣٩ ژن کۆتاییان بە ژیانی خۆیان هێناوە کە ٢٥یان بەهۆی ناکۆکی خێزانییەوە بووە و هۆکاری ١٤ ژنەکەی دیکەش بۆ هانا پشتراستنەکراوەتەوە. لە نێو ئەو ٣٩ ژنەی کە خۆیان کوشتووە، ١١یان تەمەنیان لە خوار ١٨ ساڵەوە بووە.

کوشتنی ژنان:
لە ساڵی ڕابردوودا ١٦ ژن بوونەتە قوربانی کوشتنی شەرەف، زۆربەیان لەلایەن هاوسەرەکانیانەوە یان ئەندامانی نزیکی خێزانەکانیانەوە کوژراون.

سێدارە:
لە ساڵی ڕابردوودا ٢ ژن لە سێدارە دراون، کە تاوانەکەیان کوشتنی بە ئەنقەست بووە، یەکێک لە ژنە لە سێدارە دراوەکان بووەتە قوربانی هاوسەرگیری منداڵی.

تەقینەوەی مین:
لە ماوەی ساڵی ڕابردوودا تەقینەوەی مین لە ناوچە سنوورییەکانی کوردستان ۴ ژنی بریندار کرد، کە یەکێکیان تووشی لەدەستدانی ئەندامەکانی جەستە بووە.

تێبینی: ناوی سەرجەم دەستگیرکراوەکان و هەروەها سەرجەم ئەو حاڵەتانەی لەم ڕاپۆرتەدا ئاماژەیان پێکراوە لە ناوەندی ئاماری ڕێکخراوی مافی مرۆڤی هانا بەردەستە.

ناوەندی ئاماری ڕێکخراوی مافی مرۆڤی هانا
٨ی مارسی ٢٠٢٣

بەکارهێنانی ئەم ئامارانە بە ئاماژەدان بە سەرچاوەوە ئازادە