بە پشتبەستن بە ئاماری تۆماری کراو لە ناوەندی ئاماری رێکخراوی مافی مرۆڤی هانا ، لە مانگی نوامبری ٢٠٢٤ ، لانیکەم ١٩ شارۆمەندی لە سێدارە دراون ، لانیکەم ٣٣ شارۆمەندی کورد دەستبەسەر کراون ، ١٢ بەندکراو بە ٣٩٥ مانگ بەندکران سزا دراون ، ٥ بەندکراو سزای لە سێدارەدانیان بە سەردا سەپێنراوە ، ٥ کۆڵبەر کوژراو یا بریندار بوون و لانیکەم ١٢ کەس کۆتاییان بە ژیانی خۆیان هێناوە .

دەستبەسەر کردنەکان :

لە مانگی نوامبری ٢٠٢٤ ، لانیکەم ٣٣ شارۆمەندی کورد بە شێوەی هەڕەمەکێ و خۆسەرانە و بەبێ هیچ جۆرە فەرمانێکی دەستبەسەر کردن لە لایەن دادگاکانەوە ، بانگ و دەستبەسەر کراون .
ناسنامەی ئەم ٣٣ کەسە بۆ رێکخراوی مافی مرۆڤی هانا سەلمێنراوە کە زۆربەیان بە تۆمەتی چالاکی سیاسی ، هاوکاری لەگەڵ حزبە کوردستانیەکانی ئۆپۆزۆسیۆنی کۆماری ئیسلامی ، چالاکی مەدەنی  دەستبەسەر کراون .

سێدارە :

لە مانگی نوامبری ٢٠٢٤ لانیکەم ١٩ شارۆمەندی کورد لە بەندیخانەکانی ئێران لە سێدارە دراون . لەم ژمارە ١١ کەس کەس بە تۆمەتی تاوانەکانی پەیوەست بە مادەهۆشبەرەکان و ٨ کەسیش بە تۆمەتی کوشتنی بە ئانقەست لە سێدارە دراون . رێژەی لە سێدارەدانەکان لە مانگی نوامبر ٧٠ لە سەد بە نسبەت مانگی ئۆکتۆبر بەرز بووەتەوە و زیادی کردووە و ئەمەش دەرخەری خێرایی گرتنی ماشینی ئێعدامی کۆماری ئیسلامیە .

سزای بەندکراوان :

لە مانگی نوامبری ٢٠٢٤ ، بۆ ١٢ کەس سزای ٣٩٥ مانگ بەندکران دەرکراوە . لە مانگی نوامبر ٥ بەندکراو سزای لە سێدارەدانیان بە سەردا سەپێنراوە . وریشە مورادی و میهراب عەبدوڵڵا زادە بە تۆمەتی سیاسی و ناسر بەکرزادە ، ئازاد شوجاعی و ئیدریس ئاڵی بە تۆمەتی سیخوڕی بۆ ئیسرائیل سزای لە سێدارەدانیان بە سەردا سەپێنراوە .

کۆڵبەران : 

بە پشتبەستن بە ئاماری هانا ، لە مانگی نوامبری ٢٠٢٤ ، لانیکەم ٥ کۆڵبەر و کاسبکار کوژراو و بریندار بوون . لەم ژمارە کەسێک بە هۆی ڕووداوی سروشتی کوژراوە ، کەسێک بە هۆی تەقینەوەی مین بریندار بووە و ٣ کەسیش بە تەقەی ڕاستەوخۆی هێزەکانی پاسەوانی سنوور بریندار بوون .

خۆکوشتن :

لە مانگی نوابمی ٢٠٢٤ ، لانیکەم ١٢ کەس لە شارەکان و ئاواییەکانی کوردستان خۆیان کوشتووە کە یەک کەسیان منداڵی ژێر تەمەن ١٨ ساڵ بووە . بە پێی ئاماری هانا ٥ کەس لەوانەی خۆیان کوشتووە ژن و ٧ کەسیشیان پیاو بوون . هۆکاری ئەم خۆکوژیانە زۆرتر کێشەی خێزانی ، هەژاری و بەشێکیشیان هۆکارەکانیان نادیارە .

تەقینەوەی مین :

لە مانگی نوامبری ٢٠٢٤ ، بە هۆی تەقینەوەی مین کەسێک کوژراوە و یەک کەسیش بریندار بووە .

ئەنجام :

لەم مانگەشدا لە سێدارەدانەکان بەردەوام بووە و بە ڕێژەی ٧٠٪ لە چاو مانگی پێشوو زیادی کردووە ،  دەستبەسەر کردنی هەڕەمەکی و سزای نادادپەروەرانە ، سزای نامرۆڤانەی سێدارە لە لایەکەوە و لە لایەکی دیکەوە کوشتنی کۆڵبەران و کاسبکارانی کورد و بریندار کردنیان لە لایەن هێزە چەکدارەکانی کۆماری ئیسلامیەوە ، رێژەی بەرزی خۆکوژی بە تایبەتی لە نێو لاوان و مێرمنداڵان جگە لەو کێشە زۆرەی کە خەڵک لە شارەکان و ئاواییەکانی کوردستان ڕووبەڕووی دەبنەوە حکوومەتی کۆماری ئیسلامی بە سیاسەتە جیاکارییەکانی سەبارەت بە کورد ، نەبوونی گەشەسەندنی ئابووری لە پارێزگاکانی کوردستان و نەبوونی وەبەرهێنان لەو ناوچانە دۆخێکی خوڵقاندووە کە بەشێک لە خەڵک بۆ دەست خستنی بژیوی ژیانیان ڕوو لە کۆڵبەری بکەن ، کارێک پڕ لە مەترسی کە ئەنجامەکەی لە کوشتنی رۆژانەی کۆڵبەراندا دەبینین .

ناوەندی ئاماری رێکخراوی مافی مرۆڤی هانا 
٤ی دێسامبری ٢٠٢٤ 
بە کار هێنانی ئەم ئامارە بە مەرجی ئاماژەدان بە سەرچاوەکە رێگەپێدراوە .