بە پشتبەستن بە ئاماری تۆمارکراوی رێکخراوی مافی مرۆڤی هانا، لە مانگی مەی ٢٠٢٢دا لانیکەم ٣٤ شارۆمەندی کورد دەستبەسەر کراون، ٢٨ کۆڵبەر کوژراون و بریندار بوون، ٦ کرێکار لە کاتی کار کردندا بە هۆی رووداوی شوێنی کار گیانیان لەدەستداوە، لانیکەم ٢ کەس بە هۆی تەقینەوەی مین بریندار بوون، لانیکەم ١٣ کەس پەنایان بردووەتە بەر خۆکوژی و کۆتاییان بە ژیانی خۆیان هێناوە و ٧ کەسیش لە پێوەند لەگەڵ قەتڵی نامووسی یان کێشەی بنەماڵە کوژراون. 

بەندکراوان: 
لە مانگی مەی ٢٠٢٢دا لانیکەم ٣٤ شارۆمەندی کورد لەلایەن ناوەندە ئەمنییەکانی حکومەتی ئیسلامی ئێرانەوە سەرەڕۆیانە و بێ هیچ بەڵگەیەکی یاسایی دەستبەسەر کراون. 
ناوی هەموو ئەم شارۆمەندە بەندکراوانە بۆ رێکخراوی مافی مرۆڤی هانا ئاشکرایە و زۆربەیان بە تۆمەتی چالاکی سیاسی، هاوکاری لەگەڵ حزبە کوردەکانی نەیاری حکومەتی ئیسلامی ئێران و چالاکی لە بوارەکانی، کرێکاری، پیشەیی، مەدەنی، ژنان و ژینگەپارێزی گیراون. بەپێی ئەم ئامارە، لە کۆی ئەو ٣٤ کەسە بەندکراوە، ١٦ کەسیان بە تۆمەتی سیاسی، ١٤ کەس بە تۆمەتی چالاکی پیشەیی و مەدەنی، ژنێکیش لە چالاکانی بواری ژنان و شارۆمەندێکی تریش چالاکی خوێندکارییە. 

کۆڵبەران: 
بە پشتبەستن بە ئاماری هانا، لە مانگی مەی ٢٠٢٢دا ٢٨ کۆڵبەر و کاسبکاری کورد کوژراون و بریندار بوون. 
لە کۆی ئەم ٢٦ کۆڵبەرەی بریندار بوون ١٩ کەسیان بە تەقەی راستەوخۆی هێزە چەکدارەکانی حکومەتی ئیسلامی ئێران بریندار بوون. هەروەها ٣ کۆڵبەر لە ئاکامی ئازار و ئەشکەنجەی هێزە چەکدارەکانی حکومەت بریندار بوون. لە کۆی ئەم ئامارە ٤ کۆڵبەریش لە ئاکامی راوەدوونانی هێزەکانی حکومەت لە هەڵدێری چیاکان بەربوونەوە یا بە رووداوی سروشتی بریندارن بوون. زۆرترین ژمارەی ئەو کۆڵبەرانەی بوونە قوربانی لە شار و ناوچە سنوورییەکانی کوردستان بوون. 

ژنان: 
لە مانگی مەی ٢٠٢٢دا لانیکەم ٧ ژن لەلایەن ناوەندە ئەمنییەکانی حکومەتەوە دەستبەسەر کراون. هەموو ئەم بەندکراوانە بە تۆمەتی چالاکی پیشەیی، کرێکاری،، سیاسی و هاوکاری لەگەڵ حزبە کوردەکانی نەیاری حکومەتی ئیسلامی ئێران گیراون. 

قەتڵی نامووسی: 
بە پشتبەستن بە ئاماری تۆمار کراوی هانا، لە مانگی مەی ٢٠٢٢دا لانیکەم ٧ کەس لە پێوەند لەگەڵ کێشەی بنەماڵە و "نامووسی" کوژراون. لەم ژمارەیە ٣ کەسیان ژن بوون و ٤ کەسیش پیاو بوون. 

خۆکوژی‌: 
بەپێی ئاماری تۆمار کراوی هانا، لە مانگی مەی ٢٠٢٢دا لانیکەم ١٣ کەس لە شارۆمەندانی کورد لە شار و گوندەکانی کوردستان کۆتاییان بە ژیانی خۆیان هێناوە. لە کۆی ئەم ژمارەیە ٦ کەس ژن بوون و ٧ کەسیشیان پیاو بوون. ئەو شارۆمەندانەی لە مانگی مەیدا کۆتاییان بە ژیانی خۆیان هێناوە زۆربەیان لاو بوون. ئەم خۆکوژیانەش بە هۆی باری خراپی بەڕێچوون و کێشەی بنەماڵەوە بووە. 

کرێکاران: 
بە پشتبەستن بە ئاماری تۆمار کراوی هانا، لە مانگی مەی ٢٠٢٢دا لانیکەم ٧ کرێکار دەستبەسەر کراون کە ٢ کەسیان ژن بوون. لەم مانگەدا ٦ کرێکار لە کاتی کار کردندا بە هۆی رووداوی شوێنی کار و خراپ بوونی ئەمنییەتی شوێنی کار گیانیان لەدەستداوە و ژمارەیەکی زۆر بریندار بوون. 

تەقینەوەی مین 
بە پشتبەستن بە ئاماری تۆمار کراوی هانا لە مانگی مەی ٢٠٢٢دا لانیکەم ٢ شارۆمەندی کورد لە سنوورەکانی کوردستان بە هۆی تەقینەوەی مین و تەقەمەنی بەجێماوی شەڕی ئێران و عێڕاق و مینی تازەی چێندراو لەلاین هێزە چەکدارەکانی حکومەتەوە، بریندار بوون. 
زۆرترین قوربانییانی مین کۆڵبەران و کاسبکاران و جوتیار و مەڕدارەکانی کوردستانن. 

رێکخراوی مافی مرۆڤی هانا 
١١ی جۆزەردانی ١٤٠١ 
١ی ژوئەنی ٢٠٢٢ 

تێبینی: پشتبەستن بەم ئامارە بە مەرجی ناوهێنانی سەرچاوەکەی ئازادە.