سێدارە
سزای لە سێدارەدانی ئەنوەر خزری بەندکراوی عەقیدەتی کورد لە بەندیخانەی قزڵحساری کەرەج جێبەجێ کرا
07:50 - 1/5/2024
بە پێی ڕاپۆرتی گەیشتوو بە رێکخراوی مافی مرۆڤی هانا : سەرلەبەیانی رۆژی چوارشەممە "١٢ی گوڵانی ١٤٠٣" سزای لە سێدارەدانی بەندکراوێکی عەقیدەتی کورد بە ناوی "ئەنوەر خزری" خەڵکی مەهاباد پاش نزیکەی ١٥ ساڵ بەندکران ، لە بەندیخانەی قزڵحساری کەرەج جێبەجێ کراوە .
بە پێی ڕاپۆرتی گەیشتوو ؛ رۆژی سێشەممە "١١ی گوڵانی ١٤٠٣" ئەنوەر خزری بە مەبەستی جێبەجێ کرانی سزاکەی بۆ ژووری تاکەکەسی ڕاگوێزراوە .
شایانی باسە چوار کەس لە هاودۆسیەییەکانی ئەنوەر خزری بە ناوەکانی "قاسم ئابستە ،فەرهاد سەلیمی ، ئەیوب کەریمی و داوود عەبدوڵڵاهی " لە رێکەوتی "١٤ی خەزەڵوەر ، ٨ی سەرماوەز و ١٢ی بەفرانباری ١٤٠٢" پاش ١٤ ساڵ زیندان لە زیندانی قزڵحساری کەرەج لە سێدارە دران .
بە پێی ئەم راپۆرتە ؛ لە مانگی سەرماوەزی ١٣٨٨ ئەنوەر خزری لەگەڵ شەش شارۆمەندی سونە مەزهەب بە ناوەکانی فەرهاد سەلیمی ، ئەیوب کەریمی ،داوودعەبدوڵڵاهی ، قاسم ئابستە خەڵکی شارەکانی سەقز کامران شێخە و خەسرەو بەشارەت لە لایەن هێزە ئەمنیەکانەوە دەستبەسەر کرابوون .
بە پێی ئەو راپۆرتانەی گەیشتوونەتە دەستمان ؛ ئەوان لە ئەنجامی دادگایی کردنی نادادپەروەرانە کە تێیدا قازی دادگاکە پارێزەرەکەیانی لە مافی بەرگری کردن بێبەش کردبوو ، لە جۆزەردانی ١٣٩٧ لە لایەن لقی ١٥ی دادگای ئینقلابی تاران بە تۆمەتی "گەندەڵی لە سەر زەوی" (فساد فی الارض) و تاوانەکانی پەیوەندیدار بە ئەمنیەتی نەتەوەیی بە سزای لە سێدارەدان مەحکوم کراون . پاش دەستبەسەر کران لە نێوان مانگی سەرماوەزی 1388 تا سەرەتاکانی رێبەندانی 1388 لە پارێزگای ئازەربایجانی غەربی ، ئەم حەوت کەسە گواسراونەتەوە و تۆمەتبار کراون بە ئەندام بوون لە گروپەکانی سەلەفی ، تۆمەتێک کە سەرجەمیان ڕەتیان کردبووەوە .
سەرەڕای پێشێلکارییەکی جدی لە یاساکانی دادگایی کردنی دادپەروەرانە ، لە 14ی ڕێبەندانی 1399 ، لقی 41ی دادگای باڵای وڵات ، حوکمە پێدراوەکانی لە دژی ئەم حەوت زیندانیە پشتڕاست کردەوە و لە مانگی خەرمانانی 1399 ، لقی 38ی دادگای باڵا داواکاری ئەم شارۆمەندانەی بۆ دووبارە دادگایی کردنەوە رەت کردەوە .
لە مانگی پووشپەڕی 1397 دادگایکی دیکە لە پارێزگای ئازەربایجانی غەربی ، کامران شێخەی بە تۆمەتی کوشتنی بە ئانقەستی پیاوێک کە لە ئاکامی پێکدانان لەگەڵ ئۆتۆمبێلدا گیانی لە دەستدابوو ، بە سزای لە سێدارەدان مەحکوم کرد و ئەنوەر خزری و خەسرەو بەشارەتیشی وەک هاوکارەکانی بە سزای زیندانیکردن مەحکوم کرد .
زۆرتر لەسەر ئەم بابەتە:
- قزڵحساری کەرەج ؛ جێبەجێ کرانی سزای لەسێدارەدانی بەندکراوی عەقیدەتی کورد خەسرەو بەشارەت پاش ١٥ ساڵ بەندکران
- جێبەجێ کرانی سزای لە سێدارەدانی چوار زیندانی سیاسی کورد لە زیندانی قزڵحساری کەرەج
- جێبەجێ کرانی سزای لە سێدارەدانی زیندانییەک لە زیندانی قزڵحسار
- هێرشی گاردی زیندانی قزڵحسار بۆ سەر زیندانیانی سیاسی