بەپێی راپۆرتێک کە لەم بارەوە بە هانا گەیشتووە، ناوی ئەو ئەندامانەی کۆمەڵە کە دەستبەسەر کراون بەم جۆرەی خۆارەوەیە: 

١ . پژمان فاتحی خەڵکی کامێران 
٢ . وەفا ئازەربار خەڵکی بۆکان 
٣ . موحسین مەزلووم خەڵکی مهاباد 
٤ . محەممەد فەرامەرزی (هەژیر) خەڵکی دێولان 

بەپێی ئەم راپۆرتە، سەرەڕای بەدواداچوونی بنەماڵەی ئەو شارۆمەندانە تا ئیستا هیچ زانیارییەک لە سەر بارودۆخ و شوێنی بەندکرانیان لەبەردەستدا نییە و لە هەموو مافێکی سەرەتایی و ئینسانی بێ بەشن. 

هەروەها وەزاڕەتی ئیتلاعاتی حکومەتی ئیسلامی ئێران رۆژی شەممە ١ی گەلاوێژ لە راگەیاندراوێکدا دەستبەسەرکرانی تیمێکی ١٠ کەسی بڵاوکردەوە و رایگەیاندووە "بە مەبەستی هاوکاری لەگەڵ ئیسڕائیل بەتەمای کاری خراپکارانە" بوون و دوای ئەمەش، رۆژی ٥ی گەلاوێژ لە راگەیاندنێکی دیکەدا دەڵێ: "ئەندامانی ئەو تیمە سەر بە کۆمەڵەی شۆڕشگێڕی زەحمەتکێشانی کوردستانی ئیران و هاوکاری ئیسڕائیل"ن.  

کۆمەڵەی شۆڕشگێڕی زەحمەتکێشانی کوردستانی ئێران رۆژی پێنجشەممە ٦ی گەلاوێژ لە راگەیاندنێکدا وێڕای ئاماژە بە ناتەبایی و جیاوازی حاشاهەڵنەگری لێدوان و راگەیاندنەکانی بەرپرسان و ناوەندە ئەمنییەکانی حکومەتی ئیسلامی ئێران، دەڵێ: "سیناریوی ناوەندە ئەمنییەکانی حکومەتی ئیسلامی ئێران"ـە و ئەو تۆمەتانەی دراونەتە پاڵ کۆمەڵە "دوور لە راستی و درۆیینە و هەڵبەستراو"ن. هەروەها بە وتەی عەبدوڵڵا ئازەربار ئەندامی دەفتەری سیاسی کۆمەڵە ئەم ئەندامانەی کۆمەڵە بێ چەک بوون و بە مەبەستی چالاکی "سیاسی و تەشکیلاتی و رێکخستن" رەوانەی کوردستانی ئێران کرابوون. 

رۆژی ٧ی گەلاوێژیش 'فەرماندەی هێزە ئینتزامییەکانی حکومەتی ئیسلامی ئێران" لە راگەیاندنێکی جیاواز لەوی وەزاڕەتی ئیتلاعات، هەواڵی دەستبەسەرکرانی تیمێکی ٥ کەسی سەر بە "گورووپە جیاخوازەکان" وەک ئەوەی لە راگەیاندنەکەدا هاتووە، بڵاوکردبۆوە و رایگەیاندبوو "مەبەستی ئەوان هەوڵی خراپکارانە لە پێناو خزمەت و هاوکاری بە ئیسڕائیل بووە". 

ناوەندی هاوکاریی حزبەکانی کوردستانی ئێران لە راگەیەندراوێکدا، تۆمەتەکانی ناوەندە ئەمنییەکانی حکومەتی بە بێ بنەما داناوە و لە بەشێک لە راگەیاندراوەکەدا هاتووە: "تۆمەت بەخشینەوە و تۆمەتبارکردنی هەر دەنگێکی ئازاد و هەر ڕەوتێکی خەباتکاری کوردستان بە هەبوونی پەیوەندی لەگەڵ وڵاتانی دیکە یەکێک لە سەرەکیترین کار و پیشەکانی کۆماری ئیسلامی بووە و لە ماوەی دەسەڵاتی خۆیدا بە دەیان جار حیزبەکانی رۆژهەڵاتی کوردستان و بزووتنەوەی ڕەوای خەڵکی کوردستانی بە "دەستی دەرەکی" و "هاوپەیمانی ئەمریکا و ئیسڕائیل" و... تۆمەتبار کردووە". 
شایانی باسە، بەو پێیەی کە ڕەفتاری حکومەتی ئیسلامی ئێران لە پێوەند لەگەڵ بەندکراوان روون و ئاشکرایە و بەردەوام بە زەبری ئەشکەنجە و ئازار بەندکراوان ناچار بە ئێعتڕاف و دانپێدانانی زۆرەملی دەکا، "رێکخراوی مافی مرڤی هانا" لەمبارەوە ئەوپەڕی نیگەرانی قوڵی خۆی لەم پێوەندییەدا و دوابەدوای راگەیاندنی یەکەمی کۆمەڵە دەربڕیبوو. 

هەر لەم رێگایەوە جارێکی دیکە داوا لە رێکخراوەکانی مافی مرۆڤ و ناوەندە نێونەتەوەییەکان دەکەین چاوەدێری وردی کەیسی بەندکرانی ئەم چالاکە سیاسییانە بکەن و چاوەڕوانیمان ئەوەیە بە هەوڵ و بەشداری ناوەندەکانی مافی مرۆڤ ئەم پەروەندەیە پڕۆسەیەکی دادپەروەرانە بەخۆیەوە بگرێ.