بەپێی راپۆرتی هاوکارانی رێکخراوی مافی  مرۆڤی هانا، ئەم کاسبکارە کوردە ناوی "سەلمان قوربانی" کوڕی "ئەسەدوڵڵا" و خەڵکی ئاوایی "قەڵا" لە ناوچەی کرماشانە. لە درێژەی راپۆرتەکەدا هاتووە بیانووی تەقە لە ناوبراو هەڵگرتنی شتومەکی قاچاخ راگەیەندراوە و لەلایەن هێزە چەکدارەکانی حکومەتەوە فەرمان ئەوە دراوە تەقەی لێ بکەن بەڵام ئەو ئامادە نەبووە خۆی رادەستی هێزە چەکدار و ناوەندە قەزاییەکان بکات. 

سەرچاوەیەکی نزیک لە بنەماڵەی قوربانی رایگەیاند، تەرمی سەلمان قوربانی لە پزیشکی دادی کرماشانە و ئێمە لە پێوەند لەگەڵ کوشتنی کوڕەکەماندا تەنیا هێزە چەکدارەکانی حکومەتی ئیسلامی ئێران بە بەرپرس دەزانین. 

جێگای وەبیرهێنانەوەیە لە رۆژانی رابردوودا ٣ کۆڵبەر بە ناوەکانی "ئارش نووری"، "ئەفشار دەربازی" و "سولەیمان ئیبراهیم‌زادە" لەلایەن هیزە چەکدارەکانی حکومەتەوە کوژراون و شارۆمەندێکی کوردی دیکەش بە هۆی هەڵگرتنی کاڵای قاچاخ دەستبەسەر و دواتر لە گرتووخانەی شاپوور لە تاران لە ژێر ئەشکەنجە و ئازاری زۆردا گیانی لەدەستدابوو. 

لە کوردستانی ئێران بە هۆی هەژاری و هەڵاواردنی سیستماتیکەوە خەڵک روویان کردووەتە دیاردەی زۆر پڕ مەترسی وەک کۆڵبەری و گواستنەوەی شتۆمەک بە قاچاخ و هەر بەم هۆکارەش بەرەوڕووی کردەوەی توندوتیژی هێزە چەکدارەکانی حکومەتی ئیسلامی ئیران دەبنەوە و ئەم نموونانەی سەرەوە تەنیا بەشێکی کەم لەم راستییە تاڵ و دڵتەزێنەن. ئەوە لە حاڵێکدایە بەپێی ئاماری فەرمی حکومەت لانیکەم ٨٠ لە سەدی قاچاخی کاڵا لە ئیران لە رێگا فەرمییەکانی وڵاتەوە دەکرێ.

ئیختلاس، گەندەڵی و قاچاخی کاڵا و شتوومەک لە راستیدا لەلایەن کاربەدەستانی حکومەت و سەردار و فەرماندەکانی سپاوە بۆ هەموو خەڵکی ئێران ئاشکرایە و ساڵێ میلیاردان دۆلار بە تاڵان دەچێ، ئیختلاس و قاچاخ دەکرێ. نرخی ئەو شتومەکەی کۆڵبەر و کاسبکای کورد دەیگوازێتەوە و مانگانە دەیان کەسی لە سەر دەکوژرێ و بریندار دەبێ لەچاو کاڵای قاچاخی ناوەندە دەوڵەتی و نیزامییەکان هەر بەراورد ناکرێ.