ناسنامەی ئەم شارۆمەندانە بۆ هانا  "عەلیڕەزا محەمەدی ئەرشەد ، ئیسماعیل تەجەلا کوڕی محەممەد، هیوا مەحموودی ،  ئارام خالیدی نەسەب ، محەممەد (دیاکۆ) ئیبراهیمی  و ئێحسان گوڵابی "خەڵکی پسوەی پیرانشار ، سەلمێنراوە .
 کۆبوونەوەی پێڕاگەیشتن بە تۆمەتەکانی ئەم شارۆمەندانە لە مانگی بەفرانباری ١٤٠١ ، لە لقی ١٠٢ی دادگای کەیفەری دووی پیرانشار بەڕێوە چوو و سزای بەندکرانیان بە سەردا سەپێنرا .

بە پێی ڕاپۆرتی گەیشتوو ؛ ئێحسان گوڵابی و محەممەدرەزا ئیبراهیمی بە تۆمەتی "ئەندامەتی لە یەکێک لە حزبە کوردستانییەکانی ئۆپۆزۆسیۆنی حکومەتی ئێران ، کۆبوونەوە و پیلانگێڕی لە دژی ئاسایشی وڵات ، پڕوپاگەندە لە دژی حکومەت و فیلم هەڵگرتن لە شوێنە دەوڵەتیەکان" هەر کامەیان بە ١٤ ساڵ بەندکران سزادران .
ئیسماعیل تەجەلا ، ئارام خالدی نەسەب و عەلیرەزا محەممەدی ئەرشەدیش بە تۆمەتی "ئەندامەتی لە یەکێک لە حزبەکوردستانیەکانی ئۆپۆزۆسیۆنی حکومەتی ئێران ، پڕوپاگەندە لە دژی حکومەت و کۆبوونە و پیلانگێڕی لە دژی ئاسایشی وڵات" هەر کامەیان بە شەش ساڵ و ١١ مانگ بەندکرانی تەعزیری سزا دراون .

هەروەها هیوا مەحموودی بە تۆمەتی "کۆبوونەوە و پیلانگێڕی لە دژی ئاسایشی وڵات" بە دوو ساڵ بەندکران سزادراوە .

ئەم شەش شارۆمەندە لە ڕۆژی ٥ی ڕەزبەری ١٤٠١ ، لە لایەن هێزە ئەمنییەکانەوە دەستبەسەر کران و بە مەبەستی لێپرسینەوە ڕەوانەی یەکێک لە گرتنگە ئەمنییەتییەکانی ورمێ کران و پاش کۆتایی هاتنی قۆناغەکانی لێپرسینەوە بۆ بەندیخانەی نەغەدە ڕاگوێزران و لە ڕۆژی ٨ی خەزەڵوەری ١٤٠١، بە دانانی بارمتە و بە شێوی کاتی ئازاد کرابوون .